LISBONË, 31 janar /ATSH-ANSA/ – Kryeministri socialist portugez, Antonio Costa ka fituar sërish zgjedhjet e përgjithshme të parakohshme parlamentare të zhvilluara dje në Portugali me një përqindje votash që i lejon atij të formojë një shumicë njëpartiake në parlament.
Në fund të numërimit të votave, Partia Socialiste portugeze mori të paktën 117 vende nga 230.
Sondazhet e fundit para zgjedhjeve kishin treguar një barazim me rivalin e saj opozitar të qendrës së djathtë.
Kryeministri Costa arriti të përmirësonte rezultatin e marrë në 2019 dhe nuk do varet nga ish-aleatët e tij të së majtës radikale, të cilët shkaktuan zgjedhje të parakohshme duke kundërshtuar projektbuxhetin e vitit 2022.
Ish-kryetari i bashkisë së Lisbonës, 60 vjeç, erdhi në pushtet në vitin 2015 në një bashkim të paprecedentë të krahut të majtë që nga revolucioni i vitit 1974.
”Është një fitore e përulësisë, besimit dhe stabilitetit”, u tha Costa mbështetësve./ /os/