VARSHAVË, 13 janar /ATSH-DPA/ – Ligjvënësit polakë votuan sot për të ndryshuar një pjesë të reformave të diskutueshme në drejtësi, të qeverisë së krahut të djathtë në pushtet, në një përpjekje për të liruar fondet e ngrira të ndihmës së Bashkimit Evropian.
Sejm, Dhoma e Ulët e parlamentit të Polonisë, i dërgoi vendimin Senatit polak për miratimin përfundimtar.
Komisioni i BE-së ka ngrirë miliarda grante të ndihmës së Covid-19 për Poloninë, pas shqetësimet se një pjesë e një pakete të mëparshme të reformës në drejtësi po minon ligjin e së drejtës në vend dhe po shkel angazhimet e Bashkimit Evropian.
Presidentja e Komisionit Evropian, Ursula von der Leyen tha se komisioni do të analizonte ligjin vetëm pasi të ishte miratuar nga Dhoma e Lartë e parlamentit.
Kryeministri i Polonisë, Mateusz Morawiecki tha se është arritur një kompromis i vështirë.
“Ne duam t’i japim fund kësaj mosmarrëveshjeje me Perëndimin, sepse armiku i vërtetë, kundërshtari i vërtetë është në lindje, dhe unë mendoj se të gjithë polakët janë të vetëdijshëm për këtë”, tha ai duke iu referuar Rusisë, sipas agjencisë “PAP”. //a.i/
