VARSHAVË, 15 dhjetor /ATSH-DPA/- Një dhuratë ofruar kreut të forcave policore polake, gjatë një vizite pune, në Ukrainë ka shpërthyer në selinë e policisë, njoftoi Ministria e Brendshme, në Varshavë.
Shefi i policisë, Jaroslaw Szymczyk pësoi plagë të lehta nga shpërthimi dhe u dërgua në spital. Një punonjës civil gjithashtu ka mbetur i plagosur.
Sipas Ministrisë së Brendshme, shpërthimi ka ndodhur mëngjesin e së mërkurës në një dhomë pranë zyrës së Szymczyk.
Sipas deklaratës, komandanti i policisë mori dhuratën gjatë vizitës së tij të punës në Ukrainë, më 11 dhe 12 dhjetor të këtij viti.
Szymczyk ishte takuar me udhëheqjen e policisë së Ukrainës dhe të mbrojtjes civile.
“Dhurata iu dha Szymczyks nga një drejtues i një autoriteti ukrainas”, tha ministria.
Polonia i ka kërkuar palës ukrainase shpjegime për incidentin. Prokuroria publike ka nisur hetimet. //a.i/
