PHENIAN, 28 dhjetor /ATSH-DPA/ – Udhëheqësi i Koresë së Veriut Kim Jong Un ka vendosur një sërë synimesh të reja për të rritur aftësitë mbrojtëse të vendit në vitin 2023 njoftuan mediat shtetërore.
Në raportin e tij, të paraqitur në ditën e dytë të një mbledhjeje plenare të Komitetit Qendror të Partisë, Kim analizoi “situatën e re të diskutueshme të krijuar në gadishullin Korean dhe situatën politike ndërkombëtare”, njoftoi agjencia shtetërore KCNA.
Udhëheqësi i Koresë së Veriut përcaktoi “orientimin e luftës kundër armikut … për të mbrojtur sovranitetin dhe interesat kombëtare”, si dhe “objektivat e reja kyçe për të forcuar aftësinë e vetë-mjaftueshme të mbrojtjes”.
KCNA nuk specifikoi se çfarë saktësisht do të përfshijnë këto qëllime të mbrojtjes, por Kim së fundmi tha se ‘’vendi i tij dëshiron të ketë forcën më të fortë bërthamore në të ardhmen’’.
Njoftimi vjen në një kohë të tensioneve të rritura në gadishullin Korean, pasi Koreja e Veriut ka testuar disa herë raketa me aftësi bërthamore këtë vit, në kundërshtim me rezolutat e OKB-së.
Pheniani është subjekt i sanksioneve të ashpra ndërkombëtare për shkak të programit të tij të armëve bërthamore. /os/
