PEKIN, 27 qershor /ATSH-DPA/ – Kryeministri kinez, Li Qiang hodhi poshtë debatin për reduktimin e varësisë ekonomike nga Kina dhe në vend të kësaj bëri thirrje për një bashkëpunim më të madh.
Të martën, në hapjen e një takimi të Forumit Ekonomik Botëror në Tianjin, kryeministri paralajmëroi kundër politizimit të marrëdhënieve ekonomike në botë.
“Disa në Perëndim po lartësojnë të ashtuquajturin reduktim të varësisë dhe po përqeshin frazeologjitë. Këto dy koncepte janë propozime të rreme, pasi globalizimi ekonomik e ka bërë tashmë ekonominë botërore një tërësi integrale ku interesat e të gjithëve janë të ndërthurura ngushtë, vendet janë të ndërvarura, të ndërlidhura me njëra-tjetrën”, theksoi Li.
”Politika duhet të qëndrojë jashtë biznesit. Nëse ka rreziqe në disa industri, kompanitë janë në pozicionin më të mirë për t’i vlerësuar ato”, shtoi ai.
“Ata duhet të lihen të lirë të dalin në përfundimet e tyre dhe të bëjnë zgjedhjen e tyre. Qeveritë dhe organizatat e interesuara nuk duhet të ekzagjerojnë, aq më pak të teprojnë konceptin e rrezikut ose ta kthejnë atë në një mjet ideologjik”, theksoi Li.
Pavarësisht dobësisë aktuale në rimëkëmbjen ekonomike të Kinës, Li shprehu besimin se ekonomia e dytë më e madhe në botë u rrit me 4.5% nga viti në vit në tremujorin e dytë, një përmirësim krahasuar me tremujorin e parë.
Ai tha gjithashtu se pret që objektivi i qeverisë së tij për rritje “rreth 5%” të arrihet këtë vit.
Ishte paraqitja e parë e Li në konferencë, e njohur si “Summer Davos”. Konferenca kineze vazhdon traditën e debateve dimërore në Davos në alpet zvicerane. /os/
