MYNIH, 16 shkurt /ATSH-DPA/- Dështimi i Kongresit Amerikan për të autorizuar ndihmën e mëtejshme për Ukrainën, është një “dhuratë” për presidentin rus Vladimir Putin, tha sot zëvendëspresidentja e SHBA-së, Kamala Harris.
Harris tha se Ukraina ka shumë nevojë për armë, ndërsa i afrohet përvjetorit të dytë të pushtimit të Moskës më 24 shkurt 2022.
“Ju e keni bërë të qartë se Evropa do të mbështesë Ukrainën dhe unë do ta bëj të qartë, presidenti Joe Biden dhe unë do të mbështesim Ukrainën”, tha Harris në Konferencën e Sigurisë në Mynih, duke iu drejtuar aleatëve evropianë të Kievit.
Pas disa muajsh mosmarrëveshjeje, në fillim të kësaj jave Senati i SHBA-së miratoi një ndihmë me vlerë 60 miliardë dollarë për Kievin.
Por, mbështetja për Ukrainën është kundërshtuar në mesin e shumë konservatorëve dhe nuk është e qartë nëse masa do të kalojë në Dhomën e Përfaqësuesve të udhëhequr nga republikanët. //a.i/
