Motra e Cristiano Ronaldos, Katia Aveiro, sulmon sërish trajnerin e Mancheter United, Erik Ten Hag, për trajtimin që holandezi po i bën vëllait të saj.
Katia ka bërë një krahasim të pazakontë për të treguar përbuzjen që pëson Cristiano.
Motra e portugezit ka krahasuar situatën që po përjeton “ylli” portugez me kryqëzimin e Jezusit, diçka që ka habitur shumë ndjekësit e saj:
“Askush që ka lindur për të shkëlqyer nga duart e Zotit nuk do të zhbëhet nga dikush që nuk i ka veshur kurrë këpucët e tij. Ai është dhe do të jetë vetë historia”, shkroi Katia në Instagram.
“Ekziston një varg në Bibël që thotë: “Ky njeri ju është dorëzuar me një plan të Perëndisë dhe ju, me ndihmën e njerëzve të ligj, e vrisni duke e gozhduar në kryq”, përfundoi motra e Cristianos.
Cristiano u dënua nga klubi pasi u largua nga stadiumi para se të përfundonte sfida ndaj Tottenhamit, në “Old Trafford”, të mërkurën e kaluar.
Portugezi mbeti jashtë skuadrës për ndeshjen me Chelsea-n (1-1) dhe duket se koha e tij te “Djajtë e Kuq” ka marrë fund. Të paktën për aq kohë sa Ten Hag do të vazhdojë të jetë trajner i skuadrës së njohur angleze.
Top Channel
