Ministri i Jashtëm iranian Hossein Amir-Abdollahian tha se Shtetet e Bashkuara i dërguan Iranit dy mesazhe në lidhje me përshkallëzimin në rajon.
“Mesazhi i parë thoshte se Shtetet e Bashkuara nuk janë të interesuara për zgjerimin e luftës, dhe mesazhi i dytë i kërkoi Iranit të vetëpërmbahej dhe këmbënguli që Irani gjithashtu duhet t’u kërkojë vendeve të tjera dhe palëve të tjera të kenë vetëpërmbajtje”, tha Abdollahian gjatë një konferencë shtypi në Teheran të hënën mbrëma.
Amir-Abdollahian nuk bëri të ditur se si dhe kur u dërguan mesazhet.
“SHBA thotë se nuk është e interesuar të zgjerojë luftën, por në dy javët e fundit ka treguar se është e përfshirë në zgjerimin dhe përshkallëzimin e konfliktit në Gaza duke dërguar mijëra dërgesa armësh dhe mbështetjen e plotë të regjimit sionist”, shtoi ai.
Ministri i Jashtëm iranian i tërhoqi vëmendjen presidentit amerikan Biden për atë që ai tha se ishte “hipokrizi” e pozicionit të SHBA në lidhje me të drejtat e njeriut në Gaza. “A është vdekja e më shumë se 5,000 civilëve, grave dhe fëmijëve, më shumë se 20,000 të plagosurve dhe qindra mijëra të pastrehëve, është rezultat i të drejtave të njeriut për të cilat po fliste zoti Biden?”- tha shefi i diplomacies irniane.
Ndërsa Izraeli përgatitet për një inkursion të pritshëm tokësor në Gaza, ka pasur një mori përpjekjesh diplomatike për të parandaluar që lufta e Izraelit kundër Hamasit të përshkallëzohej në një konflikt më të gjerë rajonal.
Që nga sulmi i Hamasit më 7 tetor, ka pasur zjarr të kryqëzuar të vazhdueshëm në kufirin verior të Izraelit me Libanin, ndërsa Forcat Mbrojtëse të Izraelit përleshen me Hezbollahun, lëvizjen islamike të mbështetur nga Irani që ka bazën e saj kryesore në kufirin Izrael-Liban.
CNN raportoi të hënën se SHBA-të kanë inteligjencë se grupet e milicisë të mbështetur nga Irani po planifikojnë të rrisin sulmet kundër forcave amerikane në Lindjen e Mesme, pasi Irani kërkon të përfitojë nga reagimi në rajon kundër mbështetjes së SHBA-së për Izraelin, sipas zyrtarëve të shumtë amerikanë.
Top Channel
