TIRANË, 28 mars /ATSH/ – Shoqata Ndërkombëtare e Industrisë së Licencimit të Medias (CEPIC) njoftoi bashkëpunimin me Aleancën e Agjencive Evropiane të Lajmeve (EANA), ku ATSH është anëtare me të drejta të plota, për Kongresin e ardhshëm ”CEPIC 2024!”, sipas cepic.org.
CEPIC dhe EANA do të bëjnë një ekspozitë të përbashkët të titulluar “Autenticiteti i imazhit në epokën e Al – 32 fotot më të mira nga 32 agjenci të lajmeve EANA”.
Kjo ekspozitë do të shfaqë punën e jashtëzakonshme të agjencive të lajmeve, anëtare të EANA, duke nxjerrë në pah përsosmërinë e tyre gazetareske dhe tregimin bindës.
Në vitin 2024, CEPIC po kthehet në vendin e lindjes së fotografisë dhe po pret përsëri kongresin në Juan les Pins, Antibes, në jug të Francës.
Kongresi zhvillohet nga 15 deri në 17 maj 2024, pak para Festivalit të Filmit në Kanë.
CEPIC përfaqëson qindra agjenci fotosh, që përfaqësojnë qindra mijëra fotografë, biznesi kryesor i të cilëve është licencimi i drejtpërdrejtë i përmbajtjes vizuale off-line dhe online.
Anëtarët e CEPIC janë vazhdimisht përshtatës ndaj zgjidhjeve teknologjike inovative për rritjen e sipërmarrjeve digjitale.
Midis anëtarëve të CEPIC janë lojtarë globalë si Getty Images, Shutterstock, Adobe, tregje të përmbajtjes vizuale si Alamy dhe Dreamstimes, biblioteka të arteve të bukura si Bridgeman Images ose AKG Images, arkiva historike si Roger-Viollet dhe shumë agjenci lajmesh./ a.jor.
