Java e 24-të e kampionatit francez u mbyll me ndeshjen e luajtur në “Parc Olympique” aty ku Lyon-i vendas u përballë me skuadrën e Lens.
Rezultati i këtij takimi u mbyll me fitoren 3-0 të miqve, me Lens që shënoi në secilën pjesë. Në fraksionin e parë të sfidës, Florian Sotoca gjeti golin në minutën e 43-të, duke zhbllokuar shifrat.
Sapo nisi pjesa e dytë e ndeshjes, Lens shënoi sërish me anë të Wahi, që shfrytëzoi më së miri shansin nga pika e bardhë e penalltisë. 6 minuta nga koha e rregullt, Maitland-Niles ndërlikoi akoma më shumë gjërat për Lyon-in, me kartonin e kuq në të 84-ën.
Fill pas këtij momenti, Lens gjeti dhe golin e “knock-out-it” me Danso. Deri në fund nuk pati më ndryshim rezultati, me Lyon-in që mbetet në kuotën e 28 pikëve, duke u rikthyer te humbja pas 4 suksesesh radhazi. Nga ana tjetër, Lens merr një fitore shumë të rëndësishme që e afron me 2 pikë në zonën Champions./ Super Sport
Top Channel
