“Nëse një ditë Messi më merr në telefon dhe më thotë se do të kthehet, atëherë do të flisnim dhe do të isha shumë i lumtur”, ka thënë në një intervistë për “RTVE” presidenti i Barcelonës, Laporta, duke i hapur derën një rikthimi të yllit argjentinas.
Numri një i skuadrës katalanase ka folur edhe për Ousmane Dembele që duket sikur ka rilindur nën drejtimin e Xavit: “E di që e duam dhe Xavi arriti që të gjejë mënyrën që ta bëjë funksional. Jemi krenar me të dhe ai ndihet i vlerësuar, ndonëse është pranë skadimit të kontratës e di që ndihet mirë te Barcelona dhe do të flasim me agjentin e tij”.
Ai që nuk do të vijë në Katalonjë është Haaland: “Kam qenë shumë i qartë. Institucionet dhe rregullat vijnë para gjithçkaje dhe nuk do të bëjmë blerje që shkelin sistemin tonë të pagave. Nuk do të përmend emrat e lojtarëve që na interesojnë”, ka shtuar Laporta.
Barcelona së bashku me Real Madrid dhe Juventus vazhdojnë të besojnë tek projekti SuperLigë: “Projekti vazhdon dhe po e promovojmë. Është një mënyrë për të shpëtuar futbollin europian, është shumë e rëndësishme.
Al-Khelaifi me PSG-në, por edhe City kanë një makinë që prodhon para pas tyre. Ne po luftojmë këtë gjë, sepse nuk mund të lejojmë që futbolli europian të jetë në duart e shteteve që nuk janë pjesë e Bashkimit Europian”, ka thënë mes të tjerash Laporta. / Oversport.tv
Foto: FC Barcelona Facebook