Që nga 16 dhjetori, të gjithë udhëtarët nga Zvicra dhe BE-ja, do të duhet të rezultojnë negativë dhe ata që nuk janë vaksinuar do të duhet të kalojnë në karantinë për pesë ditë
Italia njoftoi një kufizim të kushteve të hyrjes në territorin e saj për udhëtarët nga Zvicra dhe Bashkimi Europian nga e enjtja, me një test negativ të detyrueshëm për të gjithë dhe një karantinë pesëditore për ata që nuk janë vaksinuar.
Dekreti, i nënshkruar të martën në fund të ditës nga Ministri i Shëndetësisë Roberto Speranza, “parashikon paraqitjen e detyrueshme të një testi negativ në nisje për të gjithë të ardhurit nga vendet e Bashkimit Europian” (dhe Zvicra), tha një zëdhënës, njofton portali Shtegu. Deri më tani, udhëtarët europianë mund të udhëtonin në Itali me një leje shëndetësore që vërteton një orar të plotë vaksinimi, shërim të fundit ose test negativ.
Personat e pavaksinuar pas mbërritjes do të duhet të respektojnë një karantinë pesëditore, përveç shfaqjes së një testi negativ. Ata që vinin nga jashtë BE-së tashmë duhej të karantinoheshin.
Këto masa të reja, të vlefshme nga 16 dhjetori deri më 31 janar, nuk zbatohen për personat që jetojnë brenda 60 km nga kufiri. Ato vijnë pasi Europa përballet me një valë të re të Covid-19, e shënuar nga një përhapje e shpejtë e variantit Omicron.
Gjithashtu duhet theksuar se nga ky 15 dhjetor, vlefshmëria e vaksinës, pra e certifikatës Covid, shkon nga 12 në 9 muaj në Itali. Prandaj, ju duhet të jeni vaksinuar për më pak se 9 muaj ose, për ata që kanë bërë vaksinën e fundit për më shumë se 9 muaj, duhet të kenë një dozë përforcuese. Vaksina e fundit gjithashtu duhet të jetë administruar për të paktën 2 javë.
Italia, e cila ka paguar një çmim të rëndë me më shumë se 133 000 vdekje që nga fillimi i pandemisë, të martën regjistroi më shumë se 20 000 raste të reja dhe 120 vdekje.
