Presidentja Vjosa Osmani dhe kryeministri Albin Kurti kanë uruar komunitetin goran në Kosovë për ditën e tyre.
Osmani ka thënë se ky komunitete është pjesë e çmueshme e diversitetit kulturor të Kosovës.
“Sikurse motoja e kësaj feste ‘Kudo që të jesh, për festë në shtëpi të jesh’, Kosova është shtëpi e përbashkët, pra edhe e komunitetit goran. Kjo ditë, në familjet tuaja sjelltë gëzim, tolerancë e mirëkuptim. Duke kontribuar në ruajtjen e traditave tuaja kulturore, ju i jepni më shumë kuptim shumëetnicitetit të Kosovës. Komuniteti goran është pjesë aktive në institucionet e shtetit të Kosovës dhe do ta vazhdojë ta ketë mbështetjen institucionale”, ka thënë e para e vendit, transmeton Klankosova.tv.
Ndërkohë, kryeministri Kurti ka falënderuar pjesëtarët e këtij komuniteti për kontributin e tyre në jetën politike, sociale dhe kulturore të Kosovës.
“Si Qeveri angazhohemi çdo ditë që të mbrojmë të drejtat dhe identitetin kulturor të qytetarëve të të gjitha komuniteteve në Kosovë. Zyra për Çështje të Komuniteteve në kuadër të Zyrës së Kryeministrit, do të vazhdojë të mbështesë projekte të komunitetit goran, si edhe të komuniteteve të tjera, për promovimin dhe mbrojtjen e të drejtave të komuniteteve. Urimi përmbyllet me urimet më të përzemërta për këtë ditë të veçantë për të gjithë qytetarët goran të Kosovës”, ka thënë shefi i Qeverisë.
