Pas mbylljes së fazës së parë të kampionatit të vajzave në muajin dhjetor, FSHF njofton se të dielën më 14 janar do të nisin sfidat e Kupës së Shqipërisë.
Ashtu sikurse edhe vitin e kaluar, sipas skemës së re, në këtë kompeticion do të marrin pjesë 8 ekipe, ndërsa dy skuadrat e renditura në vendin e parafundit dhe të fundit, respektivisht Skënderbeu e Teuta nuk do të marrin pjesë.
Kjo skemë është përllogaritur në bazë të renditjes së skuadrave pas përfundimit të fazës së parë, teksa ky edicion i 15-të i Kupës do të ngrejë siparin më 14 janar. Ndërkaq, tetë skuadrat që do të marrin pjesë në këtë kompeticion janë: Vllaznia, Tirana, Apolonia, Partizani, Gramshi, Laçi, Lushnja dhe Kinostudio.
Sipas skemës së përcaktuar nga Departamenti i Garave në FSHF, tetë ekipet do të ndeshen me njëratjetrën sipas kësaj formule: 8- 1; 7-2; 6-3; 5-4;, ku numrat përkojnë me renditjen aktuale të ekipeve të vajzave pas fazës së parë.
Ndeshjet do të luhen me sistem vajtje-ardhje, me takimet e para që do të luhen më 14 janar dhe përballjet e dyta më 21 janar.
Ndërkaq, më pas ndeshjet e turit gjysmëfinal do të luhen në datat 28 janar dhe 4 shkurt, ndërsa Departamenti i Garave në FSHF do të përcaktojë në ditët në vijim edhe datën se kur do të luhet finalja e madhe. Kujtojmë që Vllaznia është shpallur 10 herë me radhë fituese e këtij kompeticioni kaq të rëndësishëm në futbollin e vajzave.
