ROMË, 9 dhjetor /ATSH-ANSA/ – Kina po zhytet në deflacion duke shënuar një tkurrje prej minus 0,5% në çmimet e konsumit.
Çmimet e konsumit në nëntor shënuan një tkurrje vjetore prej 0,5% (nga minus 0,2% në tetor) krahasuar me vlerësimet e një dite më parë prej minus 0,1%, më e madhja që nga nëntori 2020 për shkak të ngadalësimit të produkteve ushqimore (minus 4,2% nga minus 4% në muajin e kaluar) dhe nga rënia e mëtejshme e çmimeve të mishit të derrit.
”Çmimet e prodhimit ranë me 3% në vit, shumë më tepër se minus 2,6% në tetor dhe parashikimet e tregut prej minus 2,8 dhe kjo është rënia mujore e 14-të radhazi dhe më e madhja që nga gushti, me një ekonomi në kushte më të vështira”, tha Zyra Kombëtare kineze e Statistikave.
Deflacioni në Kinë u përshpejtua në nëntor duke nxjerrë në pah vështirësitë e ekonomisë së dytë më të madhe në botë në drejtim të ringjalljes së kërkesës së brendshme.
Të dhënat vijnë në vazhdën e pranimit nga ana e presidentit Xi Jinping se rimëkëmbja pas pandemisë është “ende në një fazë kritike”.
Dong Lijuan, një zyrtar në Byronë Kombëtare të Statistikave, vuri në dukje në një shënim se rënia në tetor ishte e lidhur me “luhatjet në rënie të çmimeve të energjisë dhe ushqimeve”.
Deflacioni, megjithatë, përbën një kërcënim për ekonominë e përgjithshme pasi konsumatorët priren të shtyjnë blerjet me shpresën e reduktimeve të mëtejshme.
Për më tepër, mungesa e kërkesës mund të shkaktojë një efekt zinxhir midis shkurtimeve të prodhimit dhe pushimeve nga puna ose ngrirjes së punësimit nga kompanitë duke u përballur me menaxhimin e inventarëve ekzistues në dëm të produktivitetit.
Për sa i përket çmimeve të prodhimit, Dong ia atribuoi rënien “një rikthimi të çmimeve ndërkombëtare të naftës që dobësoi kërkesën për disa mallra industriale”.
Ekonomia e Kinës u rrit 4,9% në tremujorin e tretë të 2023, pak më poshtë objektivit “rreth 5%” të qeverisë për të gjithë vitin.
Xi, i cili kryesoi të enjten një mbledhje tematike të Byrosë Politike të Partisë Komuniste kushtuar “punës me ekonomine”, kërkoi masa për të ringjallur rimëkëmbjen duke nënvizuar nevojën për “t’u fokusuar në përshpejtimin e ndërtimit të një sistemi industrial modern, zgjerimin e kërkesës së brendshme dhe parandalimin dhe zbutjen e rreziqeve”.
Presidenti Xi bëri thirrje gjithashtu për forcimin e “mbështetjes te vetja” në fushat kryesore të shkencës dhe teknologjisë dhe përshpejtimin e përpjekjeve për “ndërtimin e një kornize të re zhvillimi”./ a.jor.
