KIEV, 1 mars /ATSH-UKRINFORM/- Presidenti i Ukrainës Volodymyr Zelensky zhvilloi sot një bisedë me presidentin e SHBA-së Joe Biden lidhur me sanksionet amerikane anti-ruse dhe ndihmën e mbrojtjes për Ukrainën.
“Sapo pata një bisedë telefonike me presidentin e Shteteve të Bashkuara. U diskutua për sanksionet amerikane kundër Rusisë dhe ndihmën e mbrojtjes për Ukrainën. Ne duhet ta ndalojmë agresorin sa më shpejt të jetë e mundur”, shkroi Zelensky në Twitter.
Udhëheqësi i Ukrainës falënderoi gjithashtu Biden për mbështetjen.
Presidenti rus Vladimir Putin i shpalli luftë Ukrainës më 24 shkurt dhe nisi një pushtim në shkallë të gjerë.
Trupat ruse kanë bombarduar dhe shkatërruar objektet kryesore të infrastrukturës. Raketat kanë goditur ndërtesat e banimit.
Në Ukrainë u vendos ligji ushtarak dhe u shpall mobilizimi i përgjithshëm.
Ukraina ngriti zyrtarisht një padi kundër Federatës Ruse në Gjykatën Ndërkombëtare të Drejtësisë të OKB-së në Hagë.
Forcat e Armatosura të Ukrainës, me mbështetjen e të gjithë popullit ukrainas, po i rezistojnë me guxim agresionit rus. //a.i/