NJU JORK, 4 janar /ATSH-DPA/ – Një ligj i ri, i cili ndalon shtetasit e huaj të blejnë banesa në Kanada për dy vjet, me përjashtime të kufizuara, ka hyrë sot në fuqi.
Amerikanët janë gjithashtu të ndaluar, së bashku me pjesën tjetër të botës.
Ligji përcakton vetëm rregulla të veçanta për studentët e huaj me qëndrim afatgjatë, shtetasit që pretendojnë statusin e refugjatit dhe vizitorët me leje të përkohshme pune.
Përndryshe, blerja e shtëpive është e kufizuar për qytetarët kanadezë dhe banorët e përhershëm.
Kryeministri kanadez, Justin Trudeau dhe ligjvënësit thanë se ligji do të ndihmonte në ngadalësimin e rritjes se çmimit të banesave në tregun kanadez.
Toronto dhe Vancouver shpesh janë përfshirë në listat e 10 qyteteve më pak të përballueshme në botë.
“Dëshira për blerjen e shtëpive kanadeze po tërheq biznesmenët, kompanitë e pasura dhe investitorët e huaj”, tha Partia Liberale e Trudeau.
“Kjo po çon në një problem real të banesave të pashfrytëzuara dhe të lira, në spekulime të shfrenuara dhe çmime në rritje”, sipas ligjvënësve.
Por, kritikët theksuan se shumica dërrmuese e pronave në qytete të tjera të mëdha të Kanadasë janë tashmë në pronësi të kanadezëve.
“Shtetasit e huaj përbëjnë vetëm 6% të pronarëve të shtëpive në British Columbia, e cila përfshin Vankuverin dhe Ontarion”, sipas të dhënave të qeverisë.
“Ndalimi i blerjes së banesave nga shtetasit e huaj mund të ndikojë në reputacionin tonë si një komb mikpritës”, tha në një deklaratë Shoqata Kanadeze e Pasurive të Paluajtshme./ /a.i/
