TEL AVIV, 29 dhjetor /ATSH-DPA/ – Pothuajse dy muaj pas zgjedhjeve parlamentare të Izraelit, qeveria e re e fituesit Benjamin Netanyahu, do të bëjë betimin në Jerusalem.
Është qeveria më e djathtë që ka pasur ndonjëherë Izraeli, me politikanë të ekstremit të djathtë të përfaqësuar gjithashtu në koalicion për herë të parë.
Qeveria e re dëshiron të zbatojë ndryshime të gjera politike dhe, ndër të tjera, të dobësojë qëllimisht sistemin gjyqësor.
Sipas ekspertëve, ndryshimet mund të çojnë gjithashtu në anulimin e gjyqit të Netanyahut për korrupsion që është aktualisht në proces.
Edhe përpara ceremonisë së betimit sot, disa ndryshime të diskutueshme legjislative u shtynë në parlament. Këto u konsideruan si parakusht për një marrëveshje koalicioni të përbashkët.
Kjo është qeveria e gjashtë e formuar nga lideri konservator i Likud-it, Netanyahu.
Ish-kryeministri rikthehet në pushtet pas një viti e gjysmë në opozitë.
Në historinë e Izraelit, askush nuk ka qenë në detyrë më gjatë se 73-vjeçari./ /os/
