Nuk ka kohë për festë në kampin zikaltër. Menjëherë pas përfundimit, sfida ndaj Empolit është arkivuar dhe Interi është rikthyer në fushë për të përgatitur finalen e Kupës së Italisë ndaj Juventusit. Këtë të mërkurë Inzaghi do të kërkojë trofeun e dytë nën drejtimin e skuadrës milaneze, pas Superkupës së Italisë, të fituar po përballë “Zonjës së vjetër”.
Ndërkohë që puna ka nisur, e gjithë vëmendja në shtëpinë e Interit është te mbrojtësi Alessandro Bastoni. Ky i fundit duket gati për t’u rikthyer në grup dhe për të qenë i gatshëm në dispozicion të trajnerit për përballjen ndaj Juventusi.
Bastoni është jashtë që nga gjysmëfinalja e kthimit në kupën e Italisë, në derbin e fituar përballë Milanit 3-0, për shkak të një problemi muskulor.
Për momentin Bastoni është mungesa dhe shqetësimi i vetëm në kampin zikaltër. Në deklaratat e fundit të Inzaghit është kuptuar se ai mund të jetë një alternativë e shtuar, edhe pse binomi Dimarco-Perisic ka funksionuar më së miri në të majtë, nga prapavija në sulm.
Mbrojtësi ka shtuar ritmet në fushë dhe do të jetë vendimi i trajnerit për të vendosur rikthimin e tij në formacion. Për finalen ndaj Juventusit, krahas Bastonit, pritet që titullar të nisë edhe Edin Dzeko, i cili u la pushim ndaj Empolit, duke u aktivizuar vetëm 20 minutat e fundit. / oversport.tv
