Një ish-oficer i CIA-s është dënuar me 40 vjet burg për zbulimin e një grumbulli mjetesh të klasifikuara hakerimi në platformën Wikileaks.
Joshua Schulte u shpall gjithashtu fajtor për posedim të imazheve të abuzimit të fëmijëve, sipas BBC.
Prokurorët e kanë akuzuar atë për zbulimin e mjeteve të CIA-s “Vault 7”, të cilat lejojnë oficerët e inteligjencës të hakojnë telefonat inteligjentë dhe t’i përdorin ato si pajisje dëgjimi. Ata thanë se rrjedhja e informacionit është një nga më “të pafytyrat” në historinë e SHBA.
Schulte, 35 vjeç, ndau rreth 8,761 dokumente me Wikileaks në vitin 2017, që përbën shkeljen më të madhe të të dhënave në historinë e CIA-s, tha departamenti i drejtësisë amerikane.
Ai i mohoi akuzat, por u dënua për akuza të ndryshme në tre gjyqe të veçanta federale në Nju Jork në 2020, 2022 dhe 2023.
Të enjten, ai u dënua për akuza për spiunazh, hakerim kompjuterik, përbuzje të gjykatës, dhënie të deklaratave të rreme në FBI dhe posedim të imazheve të abuzimit me fëmijët.
“Joshua Schulte e tradhtoi vendin e tij duke kryer disa nga krimet më të pacipë, të urryera të spiunazhit në historinë amerikane”, tha prokurori amerikan Damian Williams.
Sipas provave të ndara në gjyq, Schulte ishte i punësuar si zhvillues softuerësh në Qendrën për Inteligjencën Kibernetike, e cila kryen spiunazh kibernetik kundër organizatave terroriste dhe qeverive të huaja.
Prokurorët thanë se në vitin 2016 ai ia transmetoi informacionin e vjedhur Wikileaks dhe më pas gënjeu agjentët e FBI-së për rolin e tij në rrjedhje.
Ata thanë se ai në dukje ishte i motivuar nga zemërimi për një mosmarrëveshje në vendin e punës.
Schulte kishte pasur vështirësi për të përmbushur afatet dhe Ndihmës Prokurori i SHBA-së, Michael Lockard tha se një nga projektet e tij ishte aq shumë prapa planit, saqë ai kishte fituar pseudonimin “Afati në lëvizje”.
Prokurorët thanë se ai donte të ndëshkonte ata që ai perceptonte se i kishin bërë keq dhe thanë se “duke kryer atë hakmarrje, ai shkaktoi dëme të mëdha në sigurinë kombëtare të këtij vendi”. Wikileaks filloi publikimin e të dhënave të klasifikuara nga dosjet në vitin 2017.
Rrjedhja, thanë prokurorët, “dëmtoi menjëherë dhe thellësisht aftësinë e CIA-s për të mbledhur inteligjencë të huaj kundër kundërshtarëve të Amerikës; vendosi personelin, programet dhe asetet e CIA-s drejtpërdrejt në rrezik; dhe i kushtoi CIA-s qindra miliona dollarë”.
FBI e intervistoi Schulte disa herë pasi WikiLeaks publikoi të dhënat, ku ai mohoi përgjegjësinë.
Një kontroll në banesën e tij, thanë prokurorët, zbuloi më vonë “dhjetëra mijëra imazhe të materialeve të abuzimit seksual të fëmijëve”.
Ata shtuan se pas arrestimit të tij, Schulte u përpoq të transmetonte më shumë informacion. Ai futi kontrabandë një telefon në burg ku u përpoq t’i dërgonte një reporteri informacione për grupet kibernetike të CIA-s dhe hartoi cicërima që përfshinin informacione për mjetet kibernetike të CIA-s nën emrin Jason Bourne, një operativ imagjinar i inteligjencës.
Ai mbahet pas hekurave që nga viti 2018.
Top Channel
