BERLIN, 14 nëntor /ATSH-DPA/- Gjermania ka shtetëzuar kompaninë e gazit “Securing Energy for Europe” (SEFE), dikur një degë e kompanisë ruse Gazprom, duke përmendur falimentimin e saj të afërt, i cili mund të çonte në ndërprerjen e furnizimeve me energji në vend.
Në një deklaratë, Ministria e Ekonomisë e justifikoi vendimin duke përmendur falimentimin e afërt të SEFE, i cili do të rrezikonte sigurinë e furnizimeve me gaz në Gjermani.
“Për të shmangur këtë rrezik dhe për të ruajtur biznesin operacional të SEFE, u krye ndryshimi i pronësisë dhe tani kompania është e stabilizuar”, tha ministria. Urdhri përkatës u botua sot në Gazetën Federale.
Ministria theksoi se SEFE, dikur “Gazprom Germania GmbH”, ka qenë nën kujdesin e Agjencisë Federale të Rrjetit që prej muajit prill.
Ministria tha se ish-pronarët do të kompensoheshin, ndërsa vuri në dukje se procesi i kompensimit nuk kishte përfunduar ende.//a.i/
