ANTALIA, 12 mars /ATSH-AA/ – Një takim historik dypalësh u zhvillua midis ministrave të Jashtëm të Turqisë dhe Armenisë në kuadër të Forumit të Diplomacisë në Antalia.
Duke folur për gazetarët, ministri i Jashtëm turk, Mevlut Çavushoglu e përshkroi takimin me homologun e tij armen Ararat Mirzoyan si ”jashtëzakonisht të frytshëm dhe konstruktiv”.
Çavushoglu gjithashtu vuri në dukje se Azerbajxhani mbështet procesin e normalizimit midis Ankarasë dhe Erevanit.
Nga ana e tij, ministri armen tha se vendi i tij është i vendosur të përkushtojë përpjekjet për paqen dhe stabilitetin në rajon dhe se po punon për normalizimin e marrëdhënieve me Turqinë.
Marrëdhëniet turko-armene hynë në një fazë të re pasi të dy vendet caktuan përfaqësues të posaçëm, të cilët zhvilluan takimin e tyre të parë më 14 janar në Moskë.
Të dërguarit nga Turqia dhe Armenia, Serdar Kiliç dhe Ruben Rubinyan, mbajtën takimin e tyre të dytë në Vjenë më 24 shkurt dhe ”përsëritën dakordësinë e tyre për të vazhduar procesin pa kushte”./ a.jor.
