SEUL, 12 prill /ATSH-DPA/ – Forcat detare amerikane kanë zhvilluar një manovër të përbashkët me marinat e Koresë së Jugut dhe Japonisë për të penguar Korenë e Veriut, njoftoi sot marina e Koresë së Jugut.
”Manovrat stërvitore dyditore, që përfshinin një aeroplanmbajtëse amerikane dhe destrojerë nga të tre vendet, u zhvillua nga e enjtja deri të premten në ujërat ndërkombëtare në jug të gadishullit Korean”, tha marina.
Qëllimi është të përmirësojnë aftësitë e tyre të reagimit të përbashkët në funksion të kërcënimeve në rritje nga raketat dhe armët bërthamore të Koresë së Veriut.
Një pjesë e ushtrimeve kishin për qëllim edhe mbrojtjen kundër nëndetëseve.
Të tre aleatët konsiderojnë gjithashtu raketat balistike që mund të lëshohen nga nëndetëset e Koresë së Veriut ndër kërcënimet.
Që nga fillimi i vitit 2022, udhëheqja komuniste në Phenian ka rritur ndjeshëm shtrirjen e testeve të raketave balistike në kundërshtim me rezolutat e OKB-së.
Koreja e Veriut është e ndaluar nga rezolutat e OKB-së të lëshojë apo edhe të testojë raketa balistike të çdo rrezeje. Këto janë zakonisht raketa tokë-tokë që mund të pajisen edhe me një kokë bërthamore.
SHBA ka rritur bashkëpunimin e saj ushtarak me Korenë e Jugut dhe Japoninë.
Stërvitjet e fundit detare thuhet gjithashtu se ndoqën një plan trajnimi trepalësh shumëvjeçar.
Planet bazohen në një marrëveshje të arritur vitin e kaluar kur krerët e tre vendeve u takuan për një samit në SHBA./ a.jor.