BERLIN, 24 prill /ATSH-DPA/ – Kancelari Olaf Scholz theksoi edhe një herë se Gjermania nuk do të dërgojë raketa me rreze të gjatë veprimi ”Taurus” në Ukrainë, pavarësisht ndihmës së re për Kievin nga Shtetet e Bashkuara të Amerikës.
”Lidhur me raketat ‘Taurus’ të Bundeswehr-it, vendimi im nuk do të ndryshojë”, tha Scholz.
“Vendimi im është shumë i qartë në lidhje me sistemin unik të armëve. Por, vendimi im është gjithashtu i qartë, ne do të vazhdojmë të jemi mbështetësit më të mëdhenj të Ukrainës në Evropë, ne do të vazhdojmë të jemi dy që bëjmë më shumë me Britaninë e Madhe”, theksoi ai.
Sunak përshëndeti “vendimin historik” të Scholz në 2022 për të rritur në mënyrë dramatike shpenzimet e mbrojtjes dhe njoftimin e fundit të Berlinit se do të dërgonte një sistem tjetër të mbrojtjes ajrore ”Patriot” në Kiev.
Por, kryeministri britanik nuk iu përgjigj drejtpërdrejt një pyetjeje në lidhje me refuzimin e Scholz për t’i dorëzuar Ukrainës raketat ”Taurus” të Bundeswehr-it.
Gjatë vizitës së vonuar inauguruese të Sunak në Kancelarinë Gjermane, 18 muaj pasi ai u bë kryeministër, të dy udhëheqësit ranë dakord gjithashtu për një bashkëpunim më të ngushtë të mbrojtjes.
Të dy vendet duan të zhvillojnë së bashku një obus të telekomanduar të aftë për të gjuajtur predha 155 milimetra deri në një distancë prej 40 kilometrash./ /os/
