MADRID, 29 qershor /ATSH-DPA/- NATO ka nisur zyrtarisht procesin e pranimit të Suedisë dhe Finlandës në aleancë, me të 30 liderët në favor, duke përfshirë presidentin turk, Recep Tayyip Erdogan, i cili e kishte shtyrë pranimin e tyre për javë të tëra.
Turqia aprovoi aplikimin e anëtarësimit të vendeve nordike në një marrëveshje të minutës së fundit përpara fillimit të samitit të NATO-s në Madrid të mërkurën.
Takimi është një vitrinë vjetore për aleancën perëndimore për të vendosur një front të bashkuar. Mosmarrëveshja mes Ankarasë dhe anëtarëve të tjerë për fatin e Suedisë dhe Finlandës kishte kërcënuar anën e solidaritetit të aleancës, veçanërisht ndërsa NATO përpiqet të përshtatet për t’u përballur me kërcënimin e Rusisë.
Të tronditur nga pushtimi rus i Ukrainës, Suedia dhe Finlanda aplikuan për t’u bashkuar me NATO-n më 18 maj. Megjithatë, Turqia e bllokoi kërkesën e tyre për javë të tëra për shkak të shqetësimeve që lidhen me terrorizmin. Anëtarësimi i ri në NATO kërkon unanimitet.
Një progres u sigurua pasi tre udhëheqësit ranë dakord të bashkëpunonin në një sërë përpjekjesh kundër terrorizmit.
Ankaraja akuzoi të dy vendet se mbështesin Partinë e Punëtorëve të Kurdistanit (PKK) dhe YPG-në, një milici kurde me bazë në Siri, të cilat Turqia i klasifikon si grupe terroriste. Të dy vendet kundërshtuan akuzat.
Turqia kërkoi gjithashtu ekstradimin e disa të dyshuarve.
Për të arritur mbështetjen e Ankarasë, Suedia dhe Finlanda u zotuan se nuk do të kishte embargo armësh kundër Turqisë.
Përveç kësaj, ata premtuan masa vendimtare kundër terroristëve kudinë dhe shqyrtim të shpejtë të kërkesave turke për ekstradimin e të dyshuarve terroristë.
Ministri turk i Drejtësisë, Bekir Bozdag tha sot se Suedia dhe Finlanda pritet të ekstradojnë 33 terroristë sipas marrëveshjes trepalëshe.
“Ne do t’u kërkojmë atyre që të përmbushin premtimet e tyre”, tha Bozdag. //a.i/