BERLIN, 21 mars /ATSH-DPA/ – Sulmet ndaj spitaleve dhe shkollave në Ukrainë po vënë rreth gjashtë milionë fëmijë në rrezik akut, tha sot organizata humanitare ”Save the Children”.
Përafërsisht një në pesë fëmijë i është dashur të largohet nga vendi i tij për t’i shpëtuar luftës, ndërsa atyre fëmijëve që mbeten në zonën e luftës u mungon ushqimi, uji i pastër dhe ndihma mjekësore, ndërsa vazhdimisht janë të detyruar të kenë frikë për jetën e tyre.
”Në të njëjtën kohë, deri më tani janë dëmtuar ose shkatërruar 489 shkolla dhe 43 spitale”, thotë organizata.
“Shkollat duhet të jenë një vend sigurie për fëmijët, jo një vend frike, lëndimi apo vdekjeje”, tha Pete Walsh, drejtor i ”Save the Children” për Ukrainën.
Të paktën 59 fëmijë janë vrarë tashmë sipas OKB-së, me raportet e medias që sugjerojnë se numri real mund të jetë treshifror.
“Rregullat e luftës janë shumë të qarta”, tha Walsh.
“Fëmijët nuk janë objektiv, as spitalet apo shkollat. Ne duhet t’i mbrojmë fëmijët e Ukrainës me çdo kusht. Sa njerëz të tjerë duhet të vdesin para se të përfundojë kjo luftë?”, pyet ai./ a.jor.
