XHEDAH, 17 korrik /ATSH-AA/ – Princi i kurorës i Arabisë Saudite, Mohammed bin Salman deklaroi se vendi i tij do ta rriste kapacitetin e prodhimit të naftës në 13 milionë fuçi në ditë.
Samiti i Xhedahut, me pjesëmarrjen e presidentit amerikan Joe Biden dhe liderëve të nëntë vendeve arabe, filloi me fjalën hapëse të Bin Salman, princit të kurorës së Arabisë Saudite, që është edhe vendi organizator.
Në fjalën e tij, Bin Salman vuri në dukje se bota po kalon një periudhë ku po përballet me shumë vështirësi.
“Shpresojmë që samiti të krijojë një epokë të re bashkëpunimi mes vendeve tona dhe SHBA-së për të thelluar partneritetin strategjik në mënyrë që t’i shërbejë interesave tona të përbashkëta dhe për të vendosur sigurinë dhe zhvillimin në rajon”, tha ai.
Duke vënë në dukje se përpjekjet ndërkombëtare duhet të rriten në luftën kundër sfidave globale, Bin Salman tha se “Arabia Saudite, ashtu si ka paralajmëruar edhe më parë, ka vendosur të rrisë prodhimin e saj të naftës në 13 milionë fuçi në ditë”.
Bin Salman foli edhe për marrëdhëniet me Iranin.
“Si vend fqinj, ne e ftojmë Iranin të jetë pjesë e këtij vizioni me vendet e rajonit duke iu përmbajtur parimeve të legjitimitetit ndërkombëtar, mosndërhyrjes në punët e brendshme të vendeve të tjera dhe t’i qëndrojë bashkëpunimit me Organizatën Ndërkombëtare të Energjisë Atomike”, tha ai.
Princi i kurorës nuk njoftoi një datë lidhur me planin e tij për të rritur prodhimin e naftës në 13 milionë fuçi në ditë, por ministri saudit i Energjisë, Abdulaziz bin Salman, në një deklaratë në maj vuri në dukje fillimin e vitit 2027 për këtë objektiv.
Ministri saudit i Energjisë ka thënë se gjatë kësaj periudhe synojnë të rrisin me mbi një milion fuçi në ditë prodhimin e naftës duke e çuar në 13 milionë./ a.jor.
