Ish-sekretari Organizativ i PD-së Eno Bozdo ka komentuar sot zhvillimet më të fundit brenda PD-së. Ai u shpreh se bashkimi mes demokratëve në struktura po ndodh.
I pyetur mbi kandidaturën e Berishës për kryetar të PD-së, Bozdo thekson se e djathta është në emergjencë për bashkim, dhe Berisha mund ta kryejë më së miri këtë mision për të paktën 1 vit.
“Nuk mund të bëhen zgjedhje brenda PD-së së Bashës se s’ka më njerëz, nuk i lënë demokratët. Nëse Basha s’jep dorëheqjen ne do shkojmë si ‘Shtëpi e Lirisë’ në zgjedhje, ai as 2 për qind s’ka për të marrë. Nëse Berisha hyn në garë probabiliteti është i lartë të fitojë ai, por s’përfundon këtu procesi. Sot jemi në çaste emergjente për bashkim. Më mirë se Berisha për të paktën për një vit nuk e bën askush. Nëse Berisha tërhiqet tani anëtarësia i thotë nuk mund të heqësh Lulin nr.1 dhe të vendosësh Lulin nr. 2. Merre përgjegjësinë për ta çuar partinë në një gjendje të mirë të galvanizuar”, tha ai.
Bozdo u shpreh se pas rezultateve të 6 marsit, edhe SHBA është duke riparë pozicionin e saj, pasi është e interesuar për demokraci funksionale.
“Besoj që SHBA-të kanë gjithë interesin që të kenë një opozitë të fortë, pavarësisht orientimit dhe qëndrimit të tyre, për të cilin kam qenë kritik. Edhe ata janë duke riparë pozicionin e tyre për demokraci funksionale. Në çastet kur institucionet janë të kapura nga Rama, do kapi edhe presidentin, e vetmja gjë që do mbajë shoqërinë në balancë është PD. Nëse PD është me Bashën apo jo, përgjigjja u mor në 6 mars. Ka ridimensionim të pozicioneve”, u shpreh ai.
