BRUKSEL, 23 shkurt /ATSH-DPA/ – Ministri polak i Drejtësisë, Adam Bodnar gjatë një konference në Berlin mbi ndjekjen penale të krimeve të luftës, bëri thirrje për mbështetje të vazhdueshme për Ukrainën kundër pushtimit rus.
”Kjo vlen si për mbështetjen politike ashtu edhe për dërgesat e nevojshme urgjente të armëve. Duhet të jemi të bashkuar”, u kërkoi ai pjesëmarrësve në konferencën ndërkombëtare, një ditë para përvjetorit të dytë të pushtimit në shkallë të plotë të Ukrainës.
Aktiviteti, i organizuar nga ministri gjerman i Drejtësisë, Marco Buschmann, u ndoq gjithashtu nga Prokurori i Përgjithshëm ukrainas, Andriy Kostin dhe përfaqësues të qeverisë amerikane.
Sipas informacionit ukrainas, më shumë se 120 000 raporte për krime të mundshme lufte janë regjistruar tashmë.
Organizatat ndërkombëtare të të drejtave të njeriut kanë akuzuar Rusinë për shkelje të përsëritura të Konventave të Gjenevës për trajtimin e të burgosurve të luftës dhe mbrojtjen e civilëve.
Sipas Buschmann, deri më tani vetëm Gjermania ka mbledhur më shumë se 500 raporte për krime lufte në Ukrainë dhe ka dëgjuar më shumë se 160 dëshmitarë.
”Është e rëndësishme t’i dërgohet një sinjal Rusisë që përgjegjësit të shpallen përgjegjës”, theksoi ministri./ /os/
