BRUKSEL, 7 shkurt /ATSH-DPA/ Sekretari i Përgjithshëm i NATO-s, Jens Stoltenberg iu kundërpërgjigj sot kërkesave ruse dhe kineze për t’i dhënë fund zgjerimit të aleancës perëndimore të mbrojtjes mes një mosmarrëveshjeje për Ukrainën.
“Kjo është një përpjekje për t’u mohuar kombeve sovrane të drejtën për të bërë zgjedhjet e tyre të ruajtura në dokumentet kryesore ndërkombëtare”, tha Stoltenberg në një konferencë për shtyp në Bruksel.
Bota nuk duhet “të kthehet në epokën e sferave të ndikimit ku fuqitë e mëdha mund t’u tregojnë të tjerëve se çfarë mund ose nuk mund të bëjnë”, tha Stoltenberg.
Ukraina aspiron të anëtarësohet në NATO, por nuk është anëtare dhe për këtë arsye nuk është pjesë e paktit të mbrojtjes reciproke të aleancës. Moska kundërshton ashpër planet e anëtarësimit të fqinjit të saj.
Një numër shtetesh të Evropës Lindore që më parë ishin pjesë e Bashkimit Sovjetik janë anëtarësuar në NATO që nga fundi i Luftës së Ftohtë në fillim të viteve 1990.
Tensionet mbeten të larta mes Rusisë dhe Perëndimit me frikën se Moska mund të planifikojë të pushtojë Ukrainën. Mbi 100,000 trupa ruse janë grumbulluar pranë kufijve të Ukrainës, sipas shefit të NATO-s, Stoltenberg.
Kremlini ka mohuar pretendimet për nisjen e një inkursioni dhe nga ana tjetër akuzon NATO-n për nxitje të tensioneve duke zhvendosur forcat drejt krahut lindor të aleancës që nga aneksimi i Krimesë nga Rusia në vitin 2014. //a.i/
