BRUKSEL, 1 nëntor /ATSH-DPA/-Bashkimi Evropian dhe Egjipti kanë nënshkruar një marrëveshje bashkëpunimi për të frenuar migrimin e padëshiruar nëpër Mesdhe.
“BE-ja do të ofrojë një ndihmë më vlere 80 milionë euro (79 milionë dollarë) për Egjiptin”, tha sot në Bruksel një zëdhënëse e përfaqësuesit të BE-së për Punët e Jashtme, Josep Borrell.
Gjithsej do të ofrohen 23 milionë euro, këtë vit. Fondi do të përdoret për thellimin e bashkëpunimit në mbrojtjen e kufijve.
Në një deklaratë të delegacionit të BE-së, në Kajro një ditë më parë, u tha se programi synon të forcojë menaxhimin e kufirit si dhe masat e kërkim-shpëtimit për migrantët në tokë dhe në det.
Në marrëveshje janë përfshirë BE-ja dhe Organizata Ndërkombëtare për Migracionin (IOM).
Numri i shtetasve egjiptianë që kërkojnë mbrojtje në Evropë është rritur kohët e fundit. Sipas agjencisë së azilit të BE-së, në mars numri i tyre ishte më i larti që nga viti 2014. Shumica e egjiptianëve që hyjnë në BE pa leje, shkojnë në Itali nëpërmjet Detit Mesdhe.
Arsyeja kryesore që egjiptianët largohen është gjendja e keqe ekonomike. Përveç kësaj, situata e të drejtave të njeriut në Egjipt mbetet një faktor kontribues.
“Faktorët ekonomikë si dhe të drejtat e njeriut kanë të ngjarë të mbeten faktorë shtytës për vendimet e migracionit të egjiptianëve, kështu që Italia do të vazhdojë të përjetojë migrim të konsiderueshëm të parregullt nga Egjipti”, tha Agjencia e Bashkimit Evropian për Azilin.//a.i/