Një pjesë e forcave ruse rreth Ukrainës po kthehen në bazat e tyre pas përfundimit të stërvitjeve, tha të martën Ministria ruse e Mbrojtjes, një veprim që mund të ulë tensionet midis Moskës dhe Perëndimit, raporton Reuters.
Agjencia ruse e lajmeve Interfax citoi ministrinë të thoshte se ndërsa stërvitjet në shkallë të gjerë vazhdojnë në të gjithë vendin, disa njësi në zonat ushtarake jugore dhe perëndimore kanë përfunduar stërvitjet e tyre dhe kanë filluar të kthehen në bazë.
Rusia ka grumbulluar më shumë se 100,000 trupa pranë kufirit me Ukrainën dhe ka ngjallur frikën e pushtimit, veçanërisht pasi stërvitjet e përbashkëta ushtarake midis Rusisë dhe Bjellorusisë po mbahen nga 10 deri më 20 shkurt, kështu që Ukraina është pothuajse plotësisht e rrethuar nga trupat ruse.
Tregjet ruse reaguan pozitivisht ndaj lajmit dhe rubla, një monedhë nën presion mes frikës së sanksioneve të reja perëndimore në rast lufte, u rrit 1.5 për qind menjëherë pas njoftimit tw Ministrisw Mbrojtjes.
Forcimi i monedhës
Monedha gjithashtu u forcua të hënën pasi ministri i jashtëm rus Sergei Lavrov i sugjeroi Presidentit Vladimir Putin që Moska të vazhdojë rrugën e saj diplomatike në përpjekjet e saj për të nxjerrë garancitë e sigurisë nga Perëndimi.
Reagimi i monedhës ndaj këtyre fjalëve tregoi se një frazë mund të mjaftonte për të lëvizur fuqishëm rublën në të dy drejtimet, tha Dmitri Polevoj, kreu i investimeve në Locko Invest.
Edhe pse Moska mohon planifikimin e një sulmi ndaj Ukrainës, ajo po kërkon nga Shtetet e Bashkuara dhe NATO të garantojnë se Ukraina nuk do të anëtarësohet kurrë në NATO. Uashingtoni dhe Brukseli po refuzojnë ta bëjnë këtë për momentin.
Kancelari gjerman Olaf Scholz mbërriti në Moskë të martën për të biseduar me Putinin dhe për të vazhduar misionin e tij për të parandaluar luftën. /tesheshi.com/
