Kryediplomati i Bashkimit Europian, Josep Borrell, ka bërë thirrje për hapjen e korridoreve humanitare në Mariupol, në Azovstal dhe zona të tjera të Ukrainës, sipas CNN.
“Duhet të sigurohet qasja e lirë dhe e sigurt për evakuimin e civilëve në përputhje me parimet bazë të të drejtave të njeriut dhe të drejtën ndërkombëtare humanitare,” tha ai.
Borrell përgëzoi “përpjekjet e Ukrainës për të gjetur një zgjidhje diplomatike për evakuimin e civilëve”, por tha se BE-së i vjen keq “që Rusia nuk po reagon”.
Në deklaratë, Borrell theksoi gjithashtu urgjencën e situatës, duke thënë:
“Për javë të tëra, bota ka parë sulme të vazhdueshme në Mariupol që kanë shkatërruar qytetin, duke përfshirë mizoritë kundër civilëve, nën një pretekst të shtrembëruar të ‘çlirimit’ të qytetit.”
“Mijëra banorë të saj janë deportuar në Rusi ose janë zhvendosur me forcë në zonat e Ukrainës që nuk kontrollohen nga qeveria”, tha ai.
Borrell tha gjithashtu se mbi 100,000 civilë kanë mbetur të bllokuar në Mariupol, duke përfshirë deri në 1,000 të cilët janë strehuar në fabrikën e çelikut Azovstal dhe mbrohen nga Forcat e Armatosura të Ukrainës.
Rruga Press
