LONDER, 14 janar /ATSH-DPA/ – Kryeministri britanik, Rishi Sunak tha se ishte i tmerruar nga vendimi i Iranit për të ekzekutuar shtetasin britaniko-iranian Alireza Akbari.
”Ky ishte një akt i pashpirt dhe burracak, i kryer nga një regjim barbar pa respekt për të drejtat e njeriut të popullit të vet”, shkroi Sunak në Twitter.
Sekretari i Jashtëm James Cleverly gjithashtu shkroi në Twitter duke thënë se “akti barbar” meritonte “dënim në termat më të fortë”.
“Kjo nuk do të qëndrojë e pakundërshtueshme”, shkroi Cleverly.
Irani ekzekutoi ish-politikanin e lartë britaniko-iranian, Alireza Akbari me akuzat për spiunazh, njoftoi faqja web e gjyqësorit, Misan.
Irani e kishte dënuar me vdekje ish-politikanin e lartë në fillim të javës.
Akbari u demaskua si një nga “agjentët më të rëndësishëm për inteligjencën britanike” dhe u akuzua për zbulim të sekreteve shtetërore.
Vendimi i Gjykatës së Lartë është përfundimtar.
Akbari, bashkëshortja dhe vëllai i tij i kishin mohuar me forcë akuzat.
”Si një politikan i rangut të lartë në Ministrinë e Mbrojtjes, Akbari kishte kultivuar një marrëdhënie të ngushtë me politikanët që po përpiqeshin të ndërmjetësonin dhe të pajtoheshin pas valës së fundit të protestave”, raportoi faqja e internetit amwaj.media me qenddër në Britaninë e Madhe.
Ka pasur raportime të përsëritura për arrestime, ndalime dhe madje edhe ekzekutime të agjentëve iranianë, të dyshuar se punonin për shërbimet e huaja sekrete, veçanërisht agjencinë izraelite Mossad ose CIA./ a.jor.
