LONDËR, 18 tetor /ATSH-DPA/ – Ministria britanike e Mbrojtjes (MoD) ka paralajmëruar lidhur me disa programe rekrutimi që ish-pilotë britanikë besohet se kanë trajnuar pjesëtarë të ushtrisë kineze.
Pilotët thuhet se kanë shërbyer në ushtrinë britanike dhe jo vetëm në Forcën Ajrore Mbretërore.
Ministria e Mbrojtjes ka lëshuar një njoftim të shërbimeve sekrete duke paralajmëruar pilotët që të mos marrin pjesë.
Në një deklaratë, Ministria e Mbrojtjes tha se po përpiqej të ndalonte rekrutimin e pilotëve të mëparshëm dhe atyre në detyrë.
“Ne po ndërmarrim hapa vendimtarë për të ndaluar programet kineze të rekrutimit që përpiqen të rekrutojnë pilotët në detyrë dhe ish-pilotët e Forcave të Armatosura Britanike të cilët kanë trajnuar personelin e Ushtrisë Çlirimtare Popullore në Republikën Popullore të Kinës”, tha një zëdhënës i Ministrisë së Mbrojtjes.
“I gjithë personeli aktual dhe i mëparshëm tashmë i nënshtrohet Aktit të Sekreteve Zyrtare dhe ne po rishikojmë përdorimin e marrëveshjeve të konfidencialitetit dhe marrëveshjeve të moszbulimit në të gjithë mbrojtjen”, theksoi ajo./ /os/
