BERLIN, 7 mars /ATSH-DPA/- Kancelari gjerman Olaf Scholz deklaroi sot se importet ruse të energjisë janë ende vendimtare për nevojat energjetike të Evropës, ndërsa vendet që mbështesin Ukrainën në konflikt po diskutojnë vendosjen e një embargoje ndaj karburanteve fosile ruse.
“Furnizimi me energji në Evropë, për prodhimin e nxehtësisë, transportin, energjinë elektrike dhe industrinë nuk mund të sigurohet për momentin në asnjë mënyrë tjetër”, tha Scholz.
“Energjia ruse ishte thelbësore për jetën e përditshme, dhe kjo ishte arsyeja pse burimet e energjisë ishin përjashtuar nga sanksionet”, tha ai.
“Prandaj ishte një vendim i qëllimshëm për të lejuar vazhdimin e aktiviteteve të bizneseve gjermane me Rusinë në lidhje me furnizimin me energji”, shtoi kancelari gjerman Scholz.
“Në të njëjtën kohë Gjermania dhe vendet e tjera kishin rënë dakord për sanksionet që do të godisnin rëndë Rusinë”, tha Scholz. //a.i/
