Atalanta triumfoi 2-1 përballë Olympiacos, duke hedhur një hap drejt kalimit në raundin e 1/8-ve.
Berat Gjimshiti zhvilloi një ndeshje të madhe, realizoi dy gola brenda dy minutave – golat e parë sezonalë me ekipin bergamask – dhe i dhuroi fitoren ekipit të tij.
Pas ndeshjes, Berat Gjimshiti u shpall lojtari më i mirë i ndeshjes.
Skuadra greke kaloi në avantazh pas çerek ore lojë falë golit të brazilianit Tiquinho Soares, por 28-vjeçari i kombëtares kuqezi e përmbysi i vetëm këtë ndeshje.
Gjimshiti kërceu bukur me kokë në minutën e 61-të. Topi në rrjetë dhe lojtari shqiptar në festë.
Mbrojtësi nga Lugina tundi përsëri rrjetën greke me një diagonale potente, duke dërguar në ekstazë tifozët e pranishëm “Gewiss Stadium”.
Pas ndeshjes, paraqitja e mbrojtësit shqiptar u vlerësua me notën më të lartë në ndeshje – 8.6, nga ‘SofaScore’.
