Akademiku dhe pedagogu i universitetit Ëarëcik në Londër, Andi Hoxhaj gjatë një intervistë në emisionin “Shqip”, ka analizuar se çfarë është “Open Balkan”.
Akademiku Hoxhaj shpjegon arsyet se pse lindi “Open Balkan” dhe çfarë është ky proces dhe përfitimet që ka Shqipëria dhe si e sheh ai ecurinë e këtij procesi. Hoxhaj shprehet se “Open Balkan” duhet lejuar të vijojë për të parë përfitimet që Shqipëria do të marrë.
“Nëse i kthehemi procesit të Berlinit në vitin 2014, ne patëm një vakum shumë të gjatë sa i përket politikës së Berlinit dhe Merkel kur i ftoi në Berlin liderët e Ballkanit perëndimor i dha si një sugjerim që për t’u futur në BE, duhet të hyjnë në një treg të përbashkët rajonal. Problemi më i madh që shoh është se nuk ka një datë fikse se kur ne do hymë në BE apo kur do të kemi akses në tregun e përbashkët evropian. Për sa nuk kemi një datë të saktë, krijohen edhe konspiracione dhe teoritë dhe këtu BE nuk ka qenë e qartë. Kemi pasur 5 procese të Berlinit dhe vetëm në 2017 u ndërmorën hapa për tregun e përbashkët rajonal, por përsëri nuk pati një datë fikse se kur do të ngrihet ky treg i përbashkët. Nuk ka një target date. Problemi këtu është se nuk ka një target date dhe këto vendet si Kosova që është kundër apo Mali i Zi e Bosnja kanë thënë që nuk jemi të qartë për këtë pasi nuk na njohin dhe kanë vënë përpara problemin politik para atij ekonomik. Këtu pastaj ne vijmë të “Open Balkan” dhe këtu ka ngelur procesi i Berlinit mbas vitit 2017-2018. “Open Balkan” pastaj u ndërmor nga Shqipëria, Serbia, Maqedonia e Veriut, madje po ta shikosh “Open Balkan” është i bazuar në shumë ato pika që janë marrë në procesin e Berlinit përsa i përket që ne legjislacionet dhe institutet t’i bëjmë njësoj, si për shembull do lëvizim të lirë me karta identiteti, njohjen e punësimit, njohje që vendet e BE i kanë të njëjta. Sipas një studimi të Bankës Botërore, nëse do të kemi një treg të përbashkët të rajonal do kemi një rritje të GDP me 5%. Tjetra që është parë pozitive është që aktualisht kamionat në doganë harxhojnë 26 milionë orë në vit që rrinë në doganë dhe që në vlerë monetare i thonë 130 milionë euro. Nëse ne do të kemi të unifikuara, këto nuk do të jenë më dhe këto mund t’i quash një përfitim. Përtej kësaj kjo është një mundësi për të tërhequr investime. Sipas meje duhet të lëmë një herë të shohim çfarë do sjellë “Open Balkan” dhe madje edhe BE nuk ka qenë kundër në fillim pasi e shihte pozitive krijimin e një tregu të përbashkët rajonal”, u shpreh akademiku Andi Hoxhaj.
