“Bashkimi Evropian e ka të qartë se çfarë i kërkohet konkretisht Maqedonisë së Veriut për të ecur përpara në procesin integrues dhe për t’u bërë anëtare e barabartë e Bashkimit Evropian dhe kjo do të arrihet vetëm duke përmbushur detyrimet nga marrëveshja e arritur vitin e kaluar”, tha Ambasadorja amerikane Angela Ageler në intervistë për TV Kanal 5.
Ambasadorja Ageler i konsideroi lajme të rreme njoftimet se dikush do të mund të rinegociojë marrëveshjen e arritur mes Maqedonisë së Veriut dhe Bullgarisë vitin e kaluar për përfshirjen e bullgarëve në Kushtetutë.
Sipas saj, është e pamundur të arrihet një marrëveshje më e mirë që ende nuk e kemi zbuluar, andaj ajo u bëri thirrje të gjithë aktorëve politikë, në vend që të ngecin në çështje dhe kontekste historike, të punojnë për interesat e qytetarëve dhe ta çojnë Maqedoninë drejt Bashkimi Evropian, sepse aty ekzistojnë mundësitë për arsim më të mirë, rritje sociale dhe ekonomike.
“Shpresoj që politikanët do të marrin këto vendime të vështira dhe se do ta njohin këtë moment vendimtar për vendin. E kuptoj që ka vështirësi, por negociatat mes Maqedonisë së Veriut dhe Bullgarisë janë të natyrës dypalëshe dhe duhet të jenë”, tha Ageler.
E pyetur për opinion për deklaratat e opozitës VMRO-DPMNE se nuk do të votojë për amendamentet kushtetuese, Ageler thotë se nuk mund të përgjigjet në vend të kryetarit të partisë Hristijan Mickoski, por megjithatë shpreson që të gjithë aktorët politikë të njohin këtë moment kyç për vendin dhe ata do të marrin vendime të mira për qytetarët, jo vendime të bazuara në aspirata politike apo personale.
“Ky vend mund dhe do të përfitojë jashtëzakonisht shumë nga anëtarësimi në BE dhe anëtarësimi në komunitetin më të gjerë transatlantik. Dhe ky është synimi shtetëror i këtij vendi dhe gati 80 për qind e qytetarëve në këtë vend duan të jenë pjesë e BE-së. Rruga përpara është shumë e qartë dhe shpresoj përsëri që liderët dhe zyrtarët e zgjedhur, të cilët u zgjodhën për të bërë gjënë e duhur për të mirën e qytetarëve të tyre, të bëjnë ato zgjedhje të vështira tani dhe ta çojnë vendin e tyre përpara drejt stabilitetit, prosperitetit dhe mundësive më të mëdha”, tha Ageler.
Lidhur me marrëdhëniet mes Maqedonisë dhe Bullgarisë, ajo tha se shpreson që të dy vendet të punojnë dhe të shikojnë nga e ardhmja, e jo nga e kaluara, sepse kryeministrat aktualë të vendeve kanë treguar synime që duan ta shohin Maqedoninë e Veriut si një vend që është i integruar në familjen evropiane.
