Për nder të 14-vjetorit të shpalljes së Pavarësisë, kryetari i LDK-së, Lumir Abdixhiku së bashku me anëtarë të Kryesisë kanë bërë homazhe te varri i ish-presidentit Ibrahim Rugova, raporton Ekonomia Online.
Ai ka thënë se në ditën e sotme, ditën më të rëndësishme të Kosovës, duhet të nderohen të gjithë themeltarët e shtetit.
“Në 14-vjetorin e ditëlindjes së shtetit të Kosovës, në ditën më të rëndësishme historike për vendin tonë, sot nderojmë të gjitha gjeneratat që për kohë të gjatë kanë bërë të mundur që ne të kemi festë më 17 shkurt. Të nderojmë intelektualët e viteve ’90, me presidentin historik, atin themeltar të shtetit të Kosovës, Ibrahim Rugova, siç nderojmë familjen Jashari, të rënët dhe i falënderojmë aleatët tanë që na qëndruan në krahë. Sot është festë dhe në këtë festë duhet të kujtojmë themelet e shtetin tonë, që janë aq të dhimbshme aq edhe të lavdishme”, ka thënë Abdixhiku pas homazheve.
