Koordinatori kundër korrupsionit i Departamentit Amerikan të Shtetit, Richard Nephew vizitoi sot Shkupin duke u takuar me krerët e shtetit. Vizita e tij ngriti edhe dyshimet se mo vallë i njejti ka sjellur të ashtuquajturën “listë të zezë”, që po paralajmërohet prej kohësh nga Ambasada e SHBA-së në Shkup, përcjell KlanM.
Ambasadorja e SHBA-së, Angela Aggeler, duke iu përgjigjur pyetjeve të gazetarëve gjatë vizitës në poligonin ushtarak Krivollak, theksoi se janë disa lista sipas të cilave persona të ndryshëm hetohen në kontekste të ndryshme për korrupsion. Ajo, siç përcjell Klan Maqedoni, mohoi që Nephew të ketë sjellë me vete edhe të ashtuquajturat “lista të zeza” të sanksioneve amerikane.
“Ai nuk është këtu për të zbuluar emra për listën e zezë apo diçka të tillë. Është këtu për të diskutuar proceset, sanksionet, protokollet që ka qeveria amerikane për çështjen e korrupsionit”, tha Aggeler.
Ajo theksoi se ambasada është në komunikim të vazhdueshëm me Uashingtonin për çështjen e korrupsionit.
“Mendoj se zoti Nephew është një aleat dhe promotor i mirë i të gjitha këtyre proceseve për të luftuar korrupsionin, që mendoj se është një nga çështjet më të rëndësishme për ju”, theksoi ambasadorja Aggeler.
Lista e zezë sipas Aggeler do të vijë nga Uashingtoni./KlanMacedonia
