VMRO dhe LSDM pothuajse çdo ditë dalin me lloj lloj argumente për të akuzuar njëra tjetrën për keqmanaxhim, krim ose korrupsion. Nga partia e Mickoskit edhe sot i quajtën “parazitë” funksionarët qeverisës, duke thënë se marrin rroga marramendëse, ndërsa siç shtojnë, kontributi në përmirësimin e jetës së qytetarëve është zero.
“Në vijën e parazitëve në sektorin e energjisë nga ESM dhe MEPSO Kovaçevski dhe Murtezani është edhe Bajram Rexhepi, drejtor ekzekutiv i Burimeve Kombëtare të Energjisë, i cili merr pagë mujore prej 1300 euro, ndërsa për një vit 15 mijë euro e paguan kjo kompani shtetërore.
Rexhepi nga BKE do t’i kushtojë shtetit 60 mijë euro për një mandat dhe askush nuk e di se cili është kontributi i tij”, tha Ivica Tomovski – VMRO DPMNE.
Edhe LSDM ka argumentet e saj kundër VMRO-DPMNE-së, për keqpërdorim të fundeve shtetërore.
“VMRO-DPMNE është parti e parazitëve, është një dukuri masive që ka vite dhe këtë e vërtetojnë fakte dhe dokumente. Gjatë regjimit, mbi 93.000 euro para publike kanë përfunduar te kreu aktual i VMRO-DPMNE-së Hristijan Mickoski, ndërsa mbi 67.000 euro kanë përfunduar te bashkëpunëtorja e tij e ngushtë Gordana Dimitrievska Kocovska. Ivica Tomovski, njeriu që çdo ditë flet për parazitët nga Pallati i Bardhë, është paraziti i vërtetë i cili si menaxher i AD ELEM Tours vetëm nga paga e tij ka marrë mbi dy milionë denarë apo mbi 30 mijë euro para të njerëzve”, pohoi Bogdanka Kuzeska – LSDM .
Edhe te partitë shqiptare akuzat nuk mungojnë, ndonëse janë më të rralla. Aleanca për shqiptarët sot akuzoi pushtetin për tejkalimin e afatit për ndërtimin e rrugës Mavrovë-Dibër. Nga ASh theksojnë se për shkak të mungesës së sinjalizimit dhe rrethojave, në këtë rrugë janë shtuar aksidentet të cilat jo rrallë herë kanë pasur edhe epilog fatal për qytetarët.