Kryeministri Dimitar Kovaçevski tha se Ngrohtorja “Shkup Veri” dhe Elektranat e Maqedonisë së Veriut sot janë në përfundim të negociatave dhe do të nënshkruajnë marrëveshje për bashkëpunim afarist dhe teknik, me të cilin EMV merr përsipër menaxhimin e ngrohtores dhe ngrohjen e shfytëzuesve të saj.
DIMITAR KOVAÇEVSKI, KRYEMINISTËR
“Menaxhmenti i ngrohtores ‘Veri’ sot në ora 13:00 është në takim tek EMV ku duhet t’i përfundojnë negociatat, të nënshkruajnë marrëveshjen për bashkëpunim afarist dhe teknik dhe të sigurojnë ngrohjen e qytetarëve në komunën e Çairit dhe komunës së Butelit, si dhe institucionet, kopshtet dhe shkollat, duke qenë se EMV ka marrë përsipër ngrohjen edhe të asaj pjese”.
Paraprakisht EMV njoftoi se furnizimi i energjisë termike po ecën pa probleme dhe do të vazhdojë edhe në periudhën e ardhshme, si dhe se për muajin dhjetor është siguruar gaz natyror nga “Makpetrol prom-gas” dhe energji termike nga TE-TO.
Përndryshe, për të 3 ditë me rradhë shkollat, çerdhet, spitali dhe institucionet tjera në komunën Çair dhe Butel kanë ngelur pa ngrohje qëndrore pasi që ngrohtorja “Shkup Veri” nuk i ka furnizuar me ngrohje këto objekte. Disa shkolla dhe çerdhe i kanë lëshuar nxënësit në shtëpi për shkak mungesës së ngrohjes. Në poliklinikë në Çair qytetarët, mes tyre shumë fëmijë, pa ngrohje presin në koridoret e ftohta të klinikës për kontrollet e tyre mjekësore.
Medina Ajeti Ali /SHENJA/