Vdes Presidenti i Emirateve të Bashkuara Arabe

by admin
Spread the love

Sheiku Khalifa bin Zayed Al Nahyan, Presidenti i Emirateve të Bashkuara Arabe, i cili ndihmoi vendin e tij të transformohej me politikat e modernizimit, ndërroi jetë të premten në moshën 73-vjeçare.

Ministria e Çështjeve Presidenciale tha se vendi shpallte 40 ditë zie kombëtare, duke nisur nga sot. Ndërsa administrata lokale dhe federale nuk do të punojnë për tri ditë.

Sheiku Khalifa mbante një rol kryesisht ceremonial, që prej pësimit të një infarkti dhe nënshtrimit ndaj një operacioni në vitin 2014. Vëllai i tij, dhe Princi i Kurorës së Abu Dabit, Sheikh Mohammed bin Zayed, është parë gjerësisht si udhëheqësi “de facto” i Emirateve, i cili merrej edhe me punët e përditshme të vendit.

Sheiku Khalifa u shpall presidenti i dytë i vendit në vitin 2004, duke pasuar në këtë post babain e tij dhe themeluesin e shtetit, Sheikun Zayed al Nahyan. I lindur në vitin 1948, Khalifa ishte djali i madh i Sheikut Zayed. Para rolit të presidentit ka qenë Princi i Kurorës së Abu Dabit dhe kryesonte Këshillin Suprem të Naftës në vend.

Ai gjithashtu ishte drejtuesi i Fondit të Investimeve të Abu Dabit, një prej fondeve më të mëdhenj në botë që menaxhon qindra miliarda dollarë pasuri në asete të ndryshme. Një prej godinave më të larta në botë, Burj Khalifa, mban emrin e tij, ndërsa mbështeti fuqimisht blerjen e klubit Manchester City, pasi ishte tifoz i zjarrtë futbolli.

Familja mbretërore e Abu Dabit, që kryesohej prej tij, flitet se ka një pasuri prej 120 miliardë dollarësh.

Sipas Kushtetutës së vendit, zv.presidenti dhe kryeministri Sheiku Mohammed bin Rashid al-Maktoum, sundues i Dubait, do të mbajë detyrën e presidentit derisa këshilli federal të mblidhet, brenda 30 ditësh, për të zgjedhur një president të ri.

You may also like