ANKARA, 22 nëntor /ATSH-DPA/ – Ministria e Jashtme e Turqisë ka thërritur ambasadorin suedez.
”Mund të konfirmojmë se ambasadori i Suedisë ka pasur një takim në Ministrinë e Jashtme turke”, shkroi Ministria e Jashtme suedeze në një email për agjencinë e lajmeve TT.
Ndërkohë, agjencia shtetërore turke e lajmeve Anadolu Agency tha dje në mbrëmje, duke cituar burime diplomatike, se sfondi ishte një incident në ambasadën turke në Stokholm.
Sipas raportit, në ndërtesën e përfaqësisë së Ankarasë në Suedi u projektuan imazhe që përmbanin “propagandë terroriste” dhe përmbajtje që fyente presidentin turk, Recep Tayyip Erdogan.
Grupet e afërta me Partinë e ndaluar të Punëtorëve të Kurdistanit (PKK) thuhet se qëndronin pas saj.
”Ambasadori Staffan Herrström tha se do të marrë masat e nevojshme”, shkruan Anadolu Agency.
Ankaraja aktualisht po bllokon pranimin e Suedisë dhe Finlandës në NATO, duke përmendur, ndër të tjera, mbështetjen e supozuar të dy vendeve për milicinë kurde siriane, Njësitë e Mbrojtjes Popullore (YPG).
Turqia e sheh YPG-në si një degë të PKK-së.
Ndër të tjera, Ankaraja kërkon ekstradimin e disa personave nga kandidatët e NATO-s./ a.jor.
