Një studim i Mjekësisë Northwestern ka gjetur se stresi i shtuar gjatë pandemisë Covid-19 ka bërë që gratë të përjetojnë parregullsi në ciklin menstrual. Gjetjet e studimit u botuan në ‘Journal of Women’s Health’.
Ky është studimi i parë amerikan për të vlerësuar ndikimin e stresit në ciklin menstrual. Studimi vëzhgoi më shumë se 200 gra në Shtetet e Bashkuara midis korrikut dhe gushtit të vitit 2020 për të kuptuar më mirë sesi stresi gjatë pandemisë së COVID-19 ndikoi në ciklet e tyre menstruale.
Më shumë se gjysma (54 përqind) e tyre përjetuan ndryshime në ciklin menstrual pas fillimit të pandemisë së koronavirusit në mars të vitit 2020. Individët që përjetuan nivele më të larta të stresit gjatë pandemisë COVID-19 kishin më shumë gjasa të përjetonin gjakderdhje më të rëndë menstruale dhe një kohëzgjatje më të gjatë të ciklit, krahasuar me individët me nivele të moderuara stresi, zbuloi studimi, shkruan Hindustantimes, transmeton Klankosova.tv.
“Ne e dimë që stresi i shtuar mund të ndikojë negativisht në shëndetin dhe mirëqenien tonë të përgjithshme, por për gratë, stresi gjithashtu mund të prishë rrjedhën normale të ciklit menstrual dhe shëndetin e përgjithshëm riprodhues,” tha autori kryesor Nicole Woitowich, asistent profesor i hulumtimit të shkencave shoqërore mjekësore në Shkollën e Mjekësisë të Universitetit Northwestern Feinberg.
Hulumtimet e mëparshme kanë gjetur se parregullsitë e ciklit menstrual shpesh raportohen nga gratë që përjetojnë çrregullime të humorit të tilla si ankthi dhe depresioni, ose nga ato që po përballen me stresorë akut të jetës si fatkeqësitë natyrore, zhvendosjet ose uria.
