I dërguari i posaçëm i SHBA-së për Ballkanin Perëndimor, Gabriel Escobar, ka përsëritur që dialogu është mënyra e vetme për të arritur një marrëveshje midis Kosovës dhe Serbisë.
Në një intervistë për mediumin “N1 Sarajevë”, Escobar gjithashtu ka theksuar se Serbia ka shumë më tepër stërvitje ushtarake me NATO-n sesa me Rusinë dhe Kinën, njofton Klan Kosova.
“Shpresa jonë për Serbinë është që ajo të ndjekë rrugën e saj europiane. Të mbyllen kapitujt, për të ecur drejt anëtarësimit në BE. Të zgjidhim dallimet me Kosovën përmes dialogut dhe të vendosim marrëdhënie të mira me të gjithë fqinjët e saj”, tha Escobar.
“Dialogu është një mekanizëm përmes të cilit ata duhet të diskutojnë dallimet. Ai udhëhiqet nga BE-ja dhe është pengesa më e madhe në rrugën drejt BE-së dhe ne e mbështesim atë. Ne nuk jemi pjesë e dialogut, por e mbështesim plotësisht. Ne gjithashtu mbështesim zbatimin e marrëveshjeve të arritura, por edhe qasjen e përshpejtuar të marrëveshjes përfundimtare”.
Escobar gjithashtu ka thënë se nuk do të ketë luftë në Bosnje dhe Hercegovinë.
“Kjo nuk do të ndodhë. E thashë një herë dhe do ta përsëris: Nuk do të ketë luftë në Bosnje e Hercegovinë. Ky nuk është viti 1991”.
“Nuk ka ushtri të Republikës Sërpska. Së dyti, ne kemi një mandat paqeruajtës nga Këshilli i Sigurimit i OKB-së. Askujt nuk i intereson një përshkallëzim i tillë. As Serbia, as Kroacia, as Rusia, kurrë. Ajo që duhet bërë, nëse shikojmë forcat e armatosura, është se si të krijohen forca të armatosura të afta për të përmbushur nevojat e të gjithëve. Përveç kësaj, me të gjitha dallimet, mes të gjitha niveleve të qeverisjes, duhet siguruar që shteti të funksionojë”.
