Tratativa mes Juventusit dhe Bayernit të Mynihut për Matthijs De Ligt ka hyrë në fazën e saj më kulmore. Drejtori sportiv i bavarezëve, Hasan Salihamidzic ka zbarkuar në Torino për të negociuar personalisht me bardhezinjtë, për të arritur marrëveshjen përfundimtare.
“Besim? Të shohim”, ka thënë Salihamidzic, që menjëherë ka takuar agjentin e mbrojtësit holandez, Rafaela Pimenta.
Ka pasur bisedime mes klubeve, por Bayerni nuk ka bërë asnjë ofertë zyrtare. Juventusi kërkon 100 milionë euro, shifër që i afrohet klauzolës 125 milionëshe. Për lojtarin është gati një kontratë 5-vjeçare, me një pagë bruto që shkon rreth 18 milionë euro në sezon.
De Ligt fiton aktualisht 8 milionë, që me bonuse mund të shkojnë deri në 12 milionë, por Juventusi i ka kërkuar ulje page për të rinovuar kontratën. / Oversport.tv
