Policia Rrugore në Shqipëri ka gjobitur me qindra shoferë vetëm në 24 orë monitorim në Rrugën e Kombit.
Përveç 331 gjobave, 100 drejtuesve u është pezulluar leja e drejtimin për tejkalim shpejtësie.
Rruga e Kombit është monitoruar përmes makinave inteligjente, radarit automatik dhe patrullat e njësisë, që janë në lëvizje.
Shefi i Njësisë për Sigurinë e Autostradës Milot-Morinë, Gramoz Dafku, thotë se shkelësit më të shpeshtë janë automjetet me targa të Kosovës.
Dafku ka theksuar se po bashkëpunohet me Policinë Kufitare, për të bërë të mundur shlyerjen e masave administrative nga drejtuesit e atyre automjeteve që kanë mundur të ndalohen nga shërbimet e Policisë Rrugore.
Makina inteligjente dhe radarët automatikë kanë monitoruar përsëri qarkullimin e automjeteve në Rrugën e Kombit, në të dy senset e lëvizjes, ku janë skanuar nga makina inteligjente, shpejtësi që varionin nga 135 km/h deri në 195 km/h.
