ROMË, 9 janar /ATSH-ANSA/- Kryeministrja e Italisë, Giorgia Meloni priti sot në një takim në Palazzo Chigi, në Romë, presidenten e Komisionit Evropian, Ursula von der Leyen.
Pas bisedës në Bruksel, me rastin e vizitës së parë jashtë vendit si kryeministre, takimi i sotëm mes Meloni dhe Von der Leyen, i zhvilluar me pjesëmarrjen e ministrit për Çështjet Evropiane, Raffaele Fitto ishte një mundësi e shkëlqyer për shkëmbimin e pikëpamjeve përpara samitit të Këshillit të Jashtëzakonshëm Evropian më 9-10 shkurt, kushtuar ekonomisë dhe migrimit.
Gjatë takimit, Meloni dhe Von der Leyen shprehën kënaqësinë e tyre për nënshkrimin e deklaratës së përbashkët BE-NATO, të planifikuar për nesër në Bruksel.
Në fund të takimit, në një postim në Twitter Von der Leyen renditi temat e samitit.
“Një kënaqësi të takoja sot Giorgia Meloni në Romë. Në funksion të takimit të ardhshëm të Këshillit Evropian, ne diskutuam mënyrat për të mbështetur Ukrainën, për të siguruar energji të sigurt dhe të përballueshme, për të rritur konkurrencën e BE-së, dhe për të patur progres në paktin e migracionit”, tha Von der Leyen. //a.i/
